လူသားတွေ လိုရာခိုင်းစေဖို့ရာအတွက် digital computers တွေကို စတင်တီထွင်ခဲ့ကြတာပါ။ ပြဿနာက စက်တွေက English ဘာသာစကားကို နားမလည်ခဲ့ကြပါဘူး။ သူတို့သိတာ 0 နဲ့ 1 ပဲ ရှိပါတယ်။ ကိုယ်လိုချင်တာ ခိုင်းစေဖို့အတွက် 0 နဲ့ 1 ပါတဲ့ အတွဲလိုက် အရှည်တွေကို အသုံးချခဲ့ကြရတာပါ။ 01 တွေနဲ့ အလုပ်လုပ်ကိုင်ရတာကအချိန်ပေးရပြီးခက်ခဲတာကြောင့် programming languages တွေကို စတင်ဖန်တီးခဲ့ကြပါတယ်။
programming languages တွေကို အသုံးချပြီး လူသားတွေက မိမိ ခိုင်းစေလိုတဲ့ ဖန်တီးလိုတဲ့အရာတွေကို ဖော်ပြကြပါတယ်။ ဒီဖော်ပြချက်တွေကို စက်တွေနား လည်နိုင်ဖို့အတွက် compiler က ကြားခံဆောင်ရွက်ပေးပါတယ်။
နှစ်ပေါင်း 60 လောက် ကျော်လာတဲ့အခါမှာ Fortran၊ Basic, Algol, COBOL, PL/1, LISP, C, C++, Python စတဲ့ နာမည်တွေနဲ့ programming languages တွေဟာ ယုန်တွေ မျိုးပွားတဲ့အတိုင်း အလျင်အမြန် တိုးပွားလာတာကြောင့် ယခုအခါမှာ ထောင်နဲ့ချီပြီးတော့တောင် ရှိနေပါပြီ။ Wikipedia မှာ ဒီ programming languages စာရင်းကို ရှာဖွေတဲ့အခါမှာလည်း စာမျက်နှာရဲ့ အဆုံးအထိရောက်ဖို့ အချိန်အတော်ကြာပါတယ်။ နှစ်တွေကြာလာတာနဲ့အမျှ ပရိုဂရမ်မာတွေက ဘုံလုပ်ငန်းဆောင်တာတွေအတွက် library အနေနဲ့ တခြား programmers တွေပါ အသုံးပြုလို့ရအောင် ဖန်တီးခဲ့ကြပါတယ်။
တဖြည်းဖြည်းနဲ့ ChatGPT လိုမျိုး large language models (LLM) တွေ ပေါ်ပေါက်လာတဲ့အခါမှာ ဒီစက်တွေက အင်္ဂလိပ်စာကြောင်းတွေကို ပေါင်းစပ်ဖွဲ့စည်းနိုင်ရုံသာမကပဲ ကွန်ပြူတာ ပရိုဂရမ်တွေကိုပါ ရေးနိုင်တာကို သိရှိသွားတဲ့အချိန် လူအများ အံ့အားသင့်သွားကြရတာပဲ ဖြစ်ပါတယ်။ စက်ကို ခိုင်းစေဖို့ရာအတွက် C++ ဒါမှမဟုတ် Python အစရှိတဲ့ programming languages တွေကို ကျွမ်းကျင်ပိုင်နိုင်အောင် လေ့လာမယ့်အစား ကိုယ်ခိုင်းစေလိုတဲ့ အရာကို AI ကိုအသုံးချပြိး English ဘာသာစကားနဲ့ ခိုင်းစေလိုက်ရင် ကိုယ်လိုချင်တဲ့ code ကို သက်ဆိုင်ရာ programming language နဲ့ ထုတ်ပေးနိုင်ပါပြီ။
ဒီလို code တွေကိုတောင် ထုတ်ပေးနိုင်ရတဲ့ အကြောင်းပြချက်ကတော့ ဒီ model တွေကို train တဲ့အဆင့်မှာ ရယူလို့ရသမျှ published လုပ်ထားတဲ့ စာမေးပွဲစာရွက်တွေနဲ့ code တွေကို အသုံးပြုထားတာကြောင့်ပဲ ဖြစ်ပါတယ်။ သူထုတ်ပေးတဲ့ code တွေမှာ အမှားအနည်းငယ်တော့ပါသေးပေမယ့် ဒါကလည်း train တဲ့အဆင့် များရင် များသလို အမှားနည်းလာမှာပဲ ဖြစ်ပါတယ်။ ဒီနည်းပညာက ကောင်းမွန်လာနေပြီဖြစ်တာကြောင့် programmer တွေအနေနဲ့လည်း co-pilot တစ်မျိုးအဖြစ် စတင် လက်ခံအသုံးပြုလာကြပါပြီ။ AI အနေနဲ့က ဒီ့ထက်ပိုပြီး အသုံးတည့်တဲ့ ကိရိယာအနေနဲ့ ဖြစ်လာဖို့ပဲ ရှိပါတယ်။
ဒီလိုဆိုရင် programmers တွေရဲ့ နေရာမှာ AI တွေကို အစားထိုးနိုင်တော့မှာလား၊ software ဖန်တီးသူတွေရဲ့ နေဝင်ချိန်ကို ရောက်ပြီလားဆိုပြီး မေးစရာတော့ ရှိပါတယ်။ ကျွန်တော်တို့က ရေတိုပြောင်းလဲသွားတာကို အရေးတယူလုပ်ကြပြီး ရေရှည်ပြောင်းလဲလာနိုင်တာကိုတော့ မေ့မေ့လျော့လျော့ တွေးတောတတ်ကြပါတယ်။ ဒီလိုတွေ စိုးရိမ်နေဖို့ထက် Co-pilot တွေက တကယ်တော့ software ဖန်တီးသူတွေကို မလိုအပ်တဲ့နေရာတွေမှာ အလုပ်ဝန်လျှော့ချစေနိုင်ပြီး ပိုမိုစိတ်ဝင်စားစရာကောင်းတဲ့ အကျိုးဖြစ်ထွန်းစေတဲ့အရာတွေကို ဖန်တီးနိုင်ဖို့ရာ အထောက်အပံ့ဖြစ်စေမှာပဲ ဖြစ်ပါတယ်။
Microsoft ပိုင်ဆိုင်တဲ့ GitHub ကနေ professional software ပညာရှင် ၂၀၀၀ ကျော်ကို Co-pilot နဲ့ ပတ်သက်ပြီး စစ်တမ်းကောက်ယူတဲ့ ရလဒ်တွေအရ 88% က သူတို့ကို ပိုမို အလုပ်တွင်ကျယ်စေတယ်လို့ ဆိုပါတယ်။ 59% က အလုပ်မှာ စိတ်ရှုပ်ရသက်သာစေတယ်လို့ ဆိုပါတယ်။ 74% က ‘ပိုမိုကျေနပ်စရာကောင်းတဲ့အလုပ်ရရှိဖို့ရာ အာရုံစိုက်နိုင်စေတယ်လို့ ဆိုပါတယ်၊ 96% က ထပ်တလဲလဲ အလုပ်တွေကို လုပ်ဆောင်ရတဲ့အခါ ပိုပြီးမြန်ဆန်စေတယ်လို့ ဆိုပါတယ်။ 77% က ဘယ်လိုဘယ်ပုံ ဖြေရှင်းရမယ်ဆိုတဲ့ ရှာဖွေရတဲ့အချိန်လည်း လျော့နည်းသွားတယ်လို့ ဆိုပါတယ်။ ဒီပုံအတိုင်းဆိုရင်က ဆိုးကျိုးထက် အပြုသဘောဆောင်တဲ့ အရာတစ်ခုဖြစ်နေတယ်ဆိုတာ သိသာစေပါတယ်။
AI Co-pilot တွေက programming သင်ကြားပုံကိုတောင် ပြောင်းလဲနေပြီဖြစ်ပါတယ်။ ကွန်ပြူတာသိပ္ပံသင်တန်းအများစုက code syntax နဲ့ ပရိုဂရမ်တွေကို run နိုင်ဖို့ရာ ပိုပြီး အာရုံစိုက်လေ့ရှိတတ်ကြပါတယ်။ code ဖတ်နည်းနဲ့ ရေးနည်းကို သိရှိဖို့ရာက မရှိမဖြစ်လိုအပ်နေသေးပေမယ့် testing နဲ့ debugging ကိုလည်း ပိုမိုရှင်းလင်းစွာ သင် ကြားပေးဖို့ရာ လိုအပ်ပါတယ်။ AI ကိရိယာတွေကို အသုံးပြုပြီး ကျောင်းသားတွေက ‘ဆော့ဖ်ဝဲဒီဇိုင်းဆွဲနည်း၊ ပြဿနာတစ်ခုကို မှန်မှန်ကန်ကန် ဘယ်လိုဖြေရှင်းရမယ်ဆိုတာနဲ့ ဖြေရှင်းနည်းတွေက ဘာတွေလဲ’ ဆိုတဲ့ ပိုမိုအရေးပါတာတွေကို အာရုံစိုက်လာနိုင်တယ်လို့ သိရပါတယ်။ ကျောင်းသားတွေက code syntax ကို အာရုံစိုက်နေရတာထက် optimization၊ ကျင့်ဝတ်ဆိုင်ရာပြဿနာတွေနဲ့ စနစ်တစ်ခုကို အသုံးပြုရလွယ်ကူစေခြင်းတို့မှာ ပိုမိုအချိန်ပေးနိုင်ပါတယ်။
ဆော့ဖ်ဝဲလ် developer တစ်ယောက်ဖြစ်တဲ့ Mario Fusco က “သင်ရေးတဲ့ code က သင့်ကို programmer တစ်ယောက်ဖြစ်လာစေတယ်။ သင်ဖျက်လိုက်တဲ့ကုဒ်က သင့်ကို ထက်မြက်တဲ့ programmer ဖြစ်လာစေတယ်။ ရေးစရာမလိုတဲ့ ကုဒ်ကတော့ ပိုပြီး ထက်မြက်တဲ့ programmer တစ်ယောက် ဖြစ်လာစေတယ်” လို့ ဆိုပါတယ်။ AI က developers တွေအတွက် အခုချိန်မှာတော့ အကျိုးပြုနေတာ အသေအချာပါပဲ။
Reference: ChatGPT and the like could free up coders to new heights of creativity by TheGuardian
#amchacks
